Thawngpang

NCCF le DNB Rian Tuantti A Si Cang

A voi 7nak NCCF GM hnatlaknak in The Future of NCCF Consultation cu 07 -08 October 2016, SCC, Stavanger ah tlamtling tein kan tuah kho. NCCF ramchung Khrihfabu 14 in upa 82 le sawmmi chungin upa 11, kan zapi 93 kan kai kho. A tanglei paper hna chuahpi a si.

1. The Future of NCCF Structure, Strategy & Plan – OCCF OC

2. The Future of NCCF Mission Structure, Strategy & Plan – Mission committee

3. The Future of NCCF Sunday School (SS) Structure, Strategy & Plan – SS committee


The Future of NCCF Consultation, 07 -08 October 2016, SCC, Stavanger

NCCF EC Biachahnak:

A cunglei consultation cathluan cungah consultation kai upa hna cu phu 3 ah tthen in ceihttinak ngeih a si i groups cio ceihmi kha zapi fonh in biafunnak ngeih tthan a si. Cu consultation nih bia a funmmi cu 2016 NCCF EC Lakhruak meeting ah a lanhter i NCCF EC nih a tanglei biachahnak bantuk in Agenda.01/ EC Lakhruak/2016 ah a fehter.

1. NCCF a dirhmun le a rianttuannak a tthawn deuh naklai dot-hlattu ah Technical Adviser Team ser siseh tiah consultation biafun cu kan zapi lungtling in kan fehter.

2. Technical Adviser Team (TAT) cu NCCF OC upa 6, Peter Sang le Magnar asiloah Mette bawmh hal in ser siseh tiah kan hna a tla.

3. Technical Adviser Team nih NCCF i sersiamnak ah a herhmi poah kan hlat piak hna sehlaw NCCF BM ah cathluan in chuahpi siseh, an chuahpi tik ah a si khawhnak he a si khawh lonak he ruah kemh thiam awk in kan zuam piak hna seh tiah kan hna a tla.

EC meeting ah NCCF member Khrihfabu 18 chungin bu 14 kan chuak kho. NCCYF le NCCWF in hruaitu hna zong tling tein an kai kho. NCCF EC nih TAT ah a sawmmi Pastor Magnar Mærland le Peter Sang Lian Thang zong nih TAT ah an kan cohlan caah an cungah lawmhnak tampi kan ngei. Pastor Magnar nih a kan cohlan caah Mette cu kan chawn ti lo.

TAT Meeting: A voi 1nak TAT meeting cu 17 November 2016, Oslo ah kan tuah. Consultation biafunning in NCCF cu Norway cozah ah zumhnak lei bu (trossamfunn) in register i tuah in kanmah bingin um a si khawh le si khawh lo kan zoh. Norway cozah ah Chin Khrihfa timi min, NCCF ah kan i komhning tein register tuah khawh a sinak le local Church cio kan min le register rinh khawh a sinak kan fianh hnu ah a tthatnak le a harnak zohfelnak tuah a si.


A voi 1nak TAT Meeting, 17 November 2016, Oslo

Cu hnuah Pastor Magnar nih NCCF cu Norway Baptist Union ah District in pom dingah hal dingin ruahnak a chuahpi. 2010 lio ah official tein NCCF nih a rak chawnh i DNB nih NCCF he pehtlai cu a si kho lo, local Church long in pehkhawh a si an rak kan ti cang nain i ruat tthan rih ko uhsih tiah a tthatnak le a harnak zohfel nawlh a si. A voi 2nak TAT tonnak ah Model pa 2 cungah ruahnak fun nawlh ding le zumhnak lei bu dirhmun in register tuah awk
ah cozah lei ton awk in secretary pa 2, Pastor Ceu Mang le Pastor Tawk Hmun ttuanvo pek an si.

A voi 2nak TAT Meeting, 07 January 2017, IBC, Sandnes

A voi 2nak TAT meeting cu 07 January 2017, IBC, Sandnes ah tuah a si. Secretary pa 2 nih Fylke zung ah cozah lei ttuanvo ngei ttha tein an tonmi hna cu fianternak an tuah hmasa.

Zumhnak lei bu (trossamfunn) in register i tuah in mah tein dir– Model (1) le Baptist Union ah District in um timi Model (2), Chin holh le Norway in kan khawmhmi zoh nawlh a si. NCCF BM mipi sinah holh phun 2 in langhter in SWOT analysis in fianh dingah biafun a si. TAT report cu hi attach file in zohkhawh a si.

NCCF le DNB Tonnak: NCCF consultation hlan tein DNB nih ton kan in duh ko hna an kan ti caah 27 September, 2016, Stavanger ah Mette le Secretary Pastor Ceu Mang tonnak an ngei hmasa, consultation hnu 8.01.2017, IBC, Sandnes ah DNB in GS le Mette le NCCF OC upa si hna he official tein tonnak le biaruahnak ngeih nawlh a si. NCCF le DNB cu pehtlai in rian tuantti awkah lungthin tak tein an kan sawm. Zanriah dumtinak zong kan ngei kho.

NCCF le DNB Pehtlainak caah Tonnak: A voi 5nak NCCF BM biachahnak bantuk in BM meeting hnu a zarh 1nak ah NCCF OC le Peter Sang cu 18 February 2017IBC Center ah tonnak ngeih in DNB he pehtlainak policy a ser cawlh. DNB he Arbeidsgrene (Cooperating partner) dirhmun in pehtlai ding le a tanglei hna hi ttuantti dingah chuahpi siseh tiah biafun a si.

1. DNB he Arbeidsgrene dirhmun in pehtlainak (Tilknytningsform)

2. DNB HS ah NCCF in aiawhtu i telvenak (Hovedstyre)

3. Kawlram ah mission rianttuannak (Misjonsarbeid i Myanmar)

4. Youth le Women rianttuannak ah ipehtlainak (Barn, ungdom og kvinne)

5. Phaisa kong (Økonomi)

NCCF BM nih a fehter hnu a voi 1nak NCCF le DNB (May 20, 2017) Tonnak

A cunglei biafunnak cu catial tein DNB GS le Integration Manager ah address tuah in 13 March 2017 ah pek a si i DNB HS nih NCCF he pehtlai nak ah ttuanvo (fullmark) an pekmi Pastor Magnar copy pek hnu ah pumpak zong in chawnh an si. Anmah DNB nih May 20, 2017, Sandnes Baptist Church ah ton biaruahnak an kan sawm i a tanglei hna kan kai kho.
DNB in DNB Chairman, General Secretary, Interaction Manager le Ungbaptist Director an kai, NCCF in Chairman, Secretary, Asst. Secretary, Treasurer, Asst. Treasurer, NCCYF Chairman le Peter Sang kan kai kho.

Tonnak cu Pastor Magnar nih a kan hruai i NCCF Secretary Pastor Ceu Mang thlacamnak in thawk a si. NCCF nih ca kan pekmi hna le ttuantti duhmi hna cu a dihlak in ceih dingah DNB lei in an rak chuahpi. A biapi bik cemmi DNB he “Arbeidsgrene” dirhmun in pehtlai awk ah 2017 July DNB Landsmøte ah chuahpi dingin biafun a si.

DNB nih NCCF cu Arbeidsgrene” in A Cohlan Cang: 2017 DNB Landsmøte, 6 July 2017 Stavern ah NCCF cu DNB Arbeidsgrene dirhmun in an kan cohlan, hi dirhmun in cohlanmi ah a pa 6nak kan si. DNB nih NCCF cu Arbeidsgrene in cohlan awkah meeting a kaimi chungin 90% hnatlaknak a herh. Bawipa a ttha! Meeting kai dihlak chungin minung pa 2 long nih karlak mee an pek i 98.5% lungtlinnak in lunglawm tein cohlan kan si.

DNB Landsmøte, July 2017 ah NCCF a cohlan lio Chairman, Secretary le Pu Siang Pum 

2017 July thawkin NCCF cu amah dang tein i pheu ti loin kan phak ram Khrihfabu pawlkom DNB he ttuantti awk ah Bawipa nih a kan sersiam piak cang, Bawipa min thangthat si ko seh! DNB Landsmøte ah NCCF Chairman le secretary lengah NCCF ramchung Khrihfabu 8 in upa 16 kan kai i vote zong kan pek ve.

DNB nih NCCF a Cohlan hnu Rianttuanttinak kongah Tonnak: NCCF cu DNB Arbeidsgrene in cohlan awk le a cohlan ahcun rianttuanttinak ding kong ceihtti awk ah Feb. 18, 2018 tiangah voi 5 khengte DNB he tonnak kan ngei. Cohlan hnu a voi 1nak cu 26 August, 2017,Ålgård Baptist Church a si i Mette Marie nih a hruai, NCCF cu DNB nih a pa 6nak arbeidsgrener in kan in cohlan cang hna i lunglawm tein kan in dawn hna timi lawmh bia a chim. NCCF aiawh in Secretary Pastor Ceu Mang nih DNB cungah lawmh bia a chim hnuah DNB HS ah NCCF aiawh in Pu Aung Lin Zathang thim a sinak a thanh ve hna. DNB he rianttuanttinak ah kan fehtermi hna cu;

1. DNB HS ah NCCF aiawh in NCCF Chairman Pu Aung Lin Zaathang thlah a si i Setember 11-12, 2017, DNB HS meeting thawkin nihin tiangah voi 3 a kai cang.

2. 2018 budget thawkin cozah bawmhnak hmuhmi chungin 10% pek dingin biafun a si i kr. 65 000 pek kan si cang.

3. NCCF he Kawlram chung Mission ttuanttinak lam ceihtti cuahmah a si cang.

4. NCCF in Chinram lei bawmhnak ah telpi ve dingin biafun a si i Paletwah hartong bawmhnak zongah Kr. 10 000 in an kan telpi.

5. Ungbaptist zong nih NCCYF cu a bu min in a cohlan i NCCYF Chairman Za Tlung Lian cu Ungbaptist HS Vice chairman ah rak thim a si cang. NCCYF nih a ngeihmi program zongah a si khawh chungin bawmh dingah biafun a si.

6. Baptistkvinnene le NCCWF rianttuanttinak zong ceihtti ding timhlamh cuahmah a si.

DNB nih NCCF a cohlan hnu 26 August 2017, Ålgård Baptist Church ah 1nak tonnak 

Kan thawngpang dangdang pawl: