Dear NCCF chungkhar dihlak,     

March 20, 2020

• Zantin inn kip ah Bawipa hmai kun in thlacam cio hna uhsih!
• Zarhpi pumh cu online in mahle Khrihfabu cio ah sersiam i zuam cio hna uhsih!

Pathian dawtnak le hnangam daihnak cu nan dihlak cungah um ko seh tiah NCCF min in ka hung in biakchawnh hna!

Atu lio kan ton cuahmah mi coronavirus (COVID 19) rai cu khuaruah har in a karh a rang. Nan theih cio bangin atu ca ka thlah tiang Norway ah zawtnak hrik ngei 1846, siizung um 130, nunnak liam 7 an si cang. Vawlei cung ning in zawtnak hrik ngei 250,584 an si i 10,355 nunnak a liam cang. Atu hi Europe ah rang taktak in a karh cuahmah rih.

Hi caan ah Khrihfami hna kan daithlan lo ding hi a biapi ngaingai. Cucaah NCCF chungkhar dihlak nih mahle inn cio in zantin, Bawipa hmai ah kun in thla cam cio hna uhsih! 2Chanrelnak 20:9 ah, “Kan cungah ṭhat lonak,….,rai maw, mangṭam maw a tlun ahcun, hi inn hmaiah le nangmah hmaiah hin kan dir lai, zeicahtiah na min cu hi inn chungah hin a um i kannih nih kan harnak chungin nangmah cu kan in auh lai i nang nih na kan theihpiak lai i na kan khamh lai,’ tiah an ti,”  bangin kan umnak inn cio cu Biakttheng ah ser in zan tin in siseh, Biakinn ah Khrihfa upa, nu upa, mino upa hna a dang cio in (voi khat ah upa 15 nak tam loin zarhte le zarhpi ah) siseh hi zawtnak rai in kan luatnak hnga Bawipa hmai ah kun in thla cam cio hna uhsih!

Hi rai ruangah Pathian thangthatnak kan ngeih ciomi a kan kham khawh lonak a biapi ngai rih. Mibu ton in Pathian thangthattti khawh lo in kan um lio, caan karlak cu mahle Khrihabu cio online hmang in Pathian thangthatnak, Thawngtha i hrawmnak le thlacamnak, zarhpi pumh caan ah sersiam in pumhnak ngeih i zuam cio hna uhsih! Bawi Jesuh nih John 8:32 ah Biatak cu nan hngalh lai I cu Biatak) nih cun an luatter hna lai,” a ti bang in Biatak (Bawi Jesuh nih cun hi rai hin a kan luat ter lai.

Khrihfami hna caah hi rai hi ttih tuk ding a si lo nain ralrin thiam a biapi ngai ve. Cozah lei le siizung lei in ralrinnak an kan pekning in zulh khawh i zuam buin thlacamtti le Pathian thangthattti khawh i zuam cio rih hna uhsih! Bawipa nih thluachuahnak in pe cio ko hna seh!

Bawipa rian ah nan ttuan hawi,

Ceu Mang

Secretary, NCCF